AL'KALAMINE SILA CHAPTER B KARSHE

AL’KALAMINE SILA CHAPTER B KARSHE

A daddafe ta samu ta gama typing ɗin, tana jin wani irin yanayi, wanda ya zame mata jiki, a duk sadda take rubutun labarin haka take kasancewa a cikinsa.

Wayar tata ta jona jikin chaji sannan ta dawo ta kwanta. Ta runtse idanuwanta, tana ayyano yadda wasu abubuwa suka wanzu a cikin labarin da ta gama rubutawa.

Ta rasa abin da za ta yi, sai ta jawo pillow ɗinta ta rungume, tana yin wasu irin abubuwa masu wuyar fassarawa.

A take kuma gabanta ya hau faɗuwa, tunowa da mafarkin jiya da ta yi. Ta gaggauta sakin pillow ɗin nata, ta dafe gabanta da ke tsananta faɗuwa, fargaba ta wanzu a cikin zuciyarta.

A cikin wannan halin ne barci ya ɗauke ta, ba tare da ta yi addua ba, kodayake dai dama ba saba yin ta ta yi ba..

Ilau kuwa, ta sake yin wani mafarkin, sai dai na yau ya sha bamban da na jiya. Wasu irin ruwa ne ta ji suna tsiyaya daga cikin idanuwanta, ta tara hannunta da nufin murje ruwan. Daidai sadda ta ɗora hannun a fuskarta, sai ta ji wasu irin abubuwa sun caki fuskar tata, tamkar allurai ne a jiki.

Hankalinta ya tashi sosai, ta yi saurin janye hannun nata, tana jin yadda raɗaɗi ke addabar fuska da idanuwanta. Wannan ruwan bai daina fita ba sai ma tsananta fitar da ya yi.

Tana cikin neman mafita ne ta ji wata irin murya ta karaɗe kaf ilahirin ɗakin nata. Muryar garjejiya ce da alama namiji ne, tun tana jin shi daga nesa har ya matso daf da ita.

Ta saka hannuwan nata a kunne da nufin ta kare ƙarar, sai ta sake cakar kunnuwan kamar yadda ta caki fuskar tata ɗazu. Ta gaggauta janye su cikin fasa ƙara mai tsanani.

“Mun gina tarbiyyar ƴarmu amma kin lalata mana ita ta hanyar wulaƙantaccen al-ƙalaminki. Ina ta ba ki alama a tunanina ko za ki hankalta ki daina lalata mana tarbiyyar yara, amma sai na ga abin naki ƙara yin gaba yake yi ma.

Idan har halinki shi ne ruguza ginin tarbiyyar da iyaye suka jima suna yi wa yaransu, to ki sani abun ya ƙare! Daga yau ba za ki sake samun damar yin rubutun ba ma bare har ki ci gaba da lalata wasu.

Ni aljani ne, aljanin da ke jikin mahaifin ɗaya daga cikin yaran da kika yi silar lalacewarsu. Na jima a jikinsa, sai dai ba na tasar masa. Babban abin da yake ɓata min rai shi ne in ga ranshi ya ɓaci.

An kama ƴarsa kwance da namiji, kuma a cikin gidansu, wanda hakan ya yi silar zubewarsa, yana can kwance da mutuwar ɓaren jiki. Mahaifiyar yarinyar ta shiga ƙunci da damuwa, ita kanta ba wadatacciyar lafiyar ce da ita ba.

Kin san cewa kuwa ba a nan abun ya tsaya ba?

Rubututtukanki sun ƙeƙasar mata da zuciya, ta zaɓi tafiya ta bar iyayenta, ta bi namiji.

A halin da ake ciki kenan yanzu. Wannan dalilin ya sa na ƙudirci aniyar ɗaukar fansa, ke ma na guma miki tamkar yadda kika guma wa wasu. Ke ma ki naƙasa kamar yadda kika yi silar naƙasar wani.

Sannan kuma na tabbatar cewa ba a kansu kawai abun ya tsaya ba, wanda kika yi silar lalacewarsu suna da yawa. To an gama!”

Yana kai wa nan ya furzar da iska daga bakinsa. Iskan ya isa har cikin idamuwanta, a take ruwan da ke fita daga cikinsu suka tsaya.

Abubuwan da suka fito daga cikin hannuwanta duk suka koma, sannan ya ɓace ɓat! Daga ɗakin.

A razane cikin kiɗima ta tashi zaune. Zufa ta gama wanke mata kaf ilahirin jikinta.

Wani irin zugi haɗi da raɗaɗi take jin idanuwanta na mata. Haka hannuwanta ma, tamkar ta cire su ta yar haka take ji.

Da ƙyar ta samu ta lalubo wurin kunna haske ta kunna. Sai kuma ta yi ƙoƙarin buɗe idanuwan nata, amma sam! Suka ƙi buɗuwa. Duk yadda za ta yi ta buɗe su ta yi amma gam suka manne suka ƙi buɗuwa. Azabar da take ji a cikinsu ba ta misaltuwa, tsananta kawai abun yake yi.

Ƙara ta saki da ƙarfin gaske, wacce ta rakaɗe kaf cikin gidan, har sai da iyayenta suka farka.

A guje suka yo ɗakinta, da kuma ƙannenta maza guda biyu, sai yayanta namiji ɗaya. Suka yo kanta a kiɗime suna tambayar ta abin da ya faru.

“Abba na kasa buɗe idanuwana, ku taimake ni Abbana. Wallahi duhu kawai nake gani.”

Kanta suka yi suna jinjina lamarin, yadda take kuka sosai duk sai suka tausaya mata.

“Abba hannuwana ma kamar za su cire tsabar azaba. Ku taimake ni Abba, na shiga uku ni Surayya!”

A haka wannan daren ya ƙare musu, a wahalce sosai, amma idanuwan nata sun gaza buɗuwa.

A tsawon wayewar garin nan, sosai hannuwan Surayya suka kumbura suntum, tamkar za su fashe. Ga wani irin rurewa da suka yi, wani irin ruwa mai yauƙi na ɗiga daga ƴan yatsun.

A haka rayuwar Surayya ta ci gaba da tafiya. Ta makance, hannuwanta sun lalace, a ƙarshe ma aka yanke shawarar yanke mata hannuwan saboda abun ƙara ta’azzara kawai yake yi.

Duka hannuwan nata aka yanke iya guiwar hannu, kuka iya kuka Surayya ta yi shi. Sai a yanzu take nadamar abin da ta aikata. Ga shi readers tun suna kiranta su ji ci gaban zazzafan labari, har sun gaji sun daina. A nan ta tabbatar cewa ba saboda Allah suke son ta ba, dama saboda labarin da take yi musu ne kawai. Ga shi yanzu da duniya ta juya mata baya, su kansu sun guje ta, sun daina neman ta.

Mahaifiyarta ce ta shigo duba ta da hannu, a nan ne Surayya ta cire son zuciya, ta bata labarin kaf abubuwan da suka faru, har kalar rubutun da take aikatawa sai da ta ba ta.

Sosai uwar ta jinjina lamarin. A ƙarshe aka kai ta wurin wani malami, ya mata addua sosai sannan ya bata magunguna. Tsawon watanni biyu ana mata maganin, aka samu nasarar idanuwan nata suka yi sauƙi sosai, tana gani biji-bini.

Wannan shi ne ƙarshen rayuwar Surayya. Ta biye wa zuga-zugin fans ɗinta, ta biye wa koɗa tan da suke yi, ta afka ga halaka. Ta zama musakar ƙarfi da yaji. *AL-ƘALAMI YA YI SILAR NAƘASAR SURAYYA.*

Muna roƙon Allah Ya kare mu da kariyarSa, ya tsarkake mana zukatanmu mu yi tsarkakken rubutu. Allah ya sa wannan labarin ya zama ishara ga marubuta masu irin wannan halin. Wallahi kaɗan kenan daga al’amarin Allah. Idan Surayya ta naƙasa ne, to ke kina iya mutuwa har lahira ta silar alƙalamin nan da muka miyar ba a bakin komai ba, muka ɓata shi.

Mu tuba zuwa ga Allah, mu rubuta abin da za mu iya kare kawunanmu a kansa ranar gobe ƙiyama.

Mutuwar nan da muke ji fa ba ta alerting, zo wa mutum kawai take yi a duk sadda ta ga dama.

Yau a ce kina kan rubuta wani labari sai Allah ya ɗauki rayuwarki, ta yaya kike tunanin za a kwatanta ki cewa ke ce kika mutu? Wallahi cewa za a yi wannan mai rubuta littafi kaza, wanda ya ƙunshi abu kaza, ai ita ce ta mutu.

Wa iyadhu billah! Kowa da kuke gani shaidar kirki yake so.

Mu wa kawunanmu faɗa, mu gyara alƙalaminmu, mu yi rubutu ba tare da son zuciya ba.2

Ku ci gaba da bibiyarmu, shafi na gaba insha Allahu za ku ga yadda rayuwar Zaliha za ta ƙare.

Murmushi take saki, a daidai sadda take charting a group ɗinta na novels. Sosai take jin daɗin charting ɗin, comment ɗin da fans ke mata sai daɗa mata girma yake, tana jin daɗi sosai har cikin zuciyarta.+

Shigowarsa kenan falon ya tsura mata idanuwa yana kallon ta. Rabon da ya ga ko da murmushin Zaliha an yi sati biyu, tun kafin su samu wancan saɓanin da ita. Magana ma sai dole take masa, haka girki dama tun daga wancan lokacin ya daina ci ko ta ajje masa, saboda ya ɗanɗana waccan taliyar ya ji ɗanɗanon sam bai masa ba, kamar zai yi amai. Daga nan sai bai sake attempting cin abincinta ba. Ta gaji ma ta daina girka masa.

Falon ya tsaya yana bi da kallo, yadda yake kace-kace, a yadda ya bar shi da safe haka ya dawo ya same shi.

Bayyanannen tsaki ya yi ya bar falon haɗe da nufar ɗakinsa yana mai tsananin gyaɗa kansa. A ranshi yana tunanin kawai za yi amfani da shawarar abokinsa Auwal.

Taɓe bakinta ta yi bayan ta bi shi da kallo, sannan ta ci gaba da yin charting ɗin ta a group da su Sameerah.

A haka rayuwar ma’auratan nan ta ci gaba da tafiya. Ko kaɗan babu kyautatawa a tsakanin Zaliha da Kabiru. Idan safiya ta yi dai za ta yi ƙoƙarin fitowa da sassafe ta gaishe shi, sannan ta koma ta ci gaba da abin da ke gabanta.

Ɗakinsa kuwa shi da kanshi yake gyarawa. Tunda ta daina shigowa, haka shi ma ɗin ya daina shiga nata. A falo suke gaisawa, ba yabo ba fallasa.

Tsawon wata biyu da faruwar haka, da dare bayan Kabiru ya dawo ya ya sami Zaliha a falo. Gaishe shi ta yi sannan ya nemi wuri ya zauna.

“Zaliha…”

Ta ɗago kanta ta kalle shi. Ya ce,

“Aure zan ƙara, har saura sati biyu ma auren, insha Allahu gobe za a kawo miki kayayyakinki.”

Cike da mamaki ta ɗago kanta ta kalle shi. Da ƙyar ta iya tattaro magana daga bakinta ta ce,

“Aure Yaya? Ina ƙaunar da kake min kafin aure? Ina alƙawarin da ka ɗaukar min na kasancewa tare da ni ƙwallin-ƙwal a duniya? Lallai namiji ba ɗan goyo ba ne. Namiji tabarmar ƙaya! Namiji ƙanin ajali!”

Hannunsa ya ɗaga kamar zai wanka mata mari. A fusace ya ce,

“Zaliha ni kike jifa da wannan baƙaƙen kalaman? Ni sa’anki ne? Duk wa ya ja? Kin taɓa ganin wani sauyi daga gare ni kafin ke ki sauya min? Ina naki alƙawarin da kika ɗauka na kyautatawa haɗe da faranta min rai? Kina tunanin akwai namijin da zai iya jure wannan wulaƙancin naki ne? Wannan ma ai adalci ne na miki, ba na jin irina suna da yawa, wanda za su juri ci gaba da zama da ke.”

Daga nan ya miƙe haɗe da nufar ɗakinsa. Yana shiga wayarsa ta fara ringing. Ko da ya duba amaryar ce ke kiran sa. Ya saki murmushi haɗe da ɗaukar wayar ya kara a kunnensa.

Sun jima suna wayar, har sai da ya ji shi ya wartsake daga damuwar kalaman Zaliha. Suka yi bankwana sannan ya tsinke wayar.

Gyaran ɗakin ya hau yi. Kasantuwar yau bai samu ya gyara kafin ya fita ba, saboda ya makara tashi. Ko da ya gama ya nufi kitchen. Tulin wanke-wanke ya gani jingim wani kan wani. Ya yi tsoki haɗe da gyaɗa kansa kawai.

Tukunyar da zai dafa farar shinkafa ma babu, duk ta jingime su wuri guda.

Samu ya yi ya wanke, sannan ya ɗora farar shinkafa, a gefe guda kuma ya ɗora tafasar naman da ya fiddo daga cikin freezer.

Cikin lokaci kaɗan Kabeeru ya haɗa shinkafa da sauce. Bayan ya gama duka ya harhaɗa kayan ya wanke, ya gyara kitchen ɗin sosai, a take komai ya fito ras gwanin ban sha’awa.

Abincin nashi ya zuba a plate, ya ɗauki ruwan roba daga fridge ya nufi fita.

A yadda ya bar ta haka ya same ta. Ta ƙura idanuwanta bisa waya tana ta famar rubutu, ya gyaɗa kansa sannan ya wuce ɗakinsa.

*Bayan Aure*

Da yamma aka kawo amarya, amma abin takaici ƴan kawo amaryar haka suka tarar da gidan kaca-kaca komai a wulaƙance. Sauƙin ma guda a wancan ɗayan part ɗin za a ajje ta, inda Yayan Kabirun ya tashi.

Ko arziƙin abinci ba su samu ba, haka suka ƙaraci zamansu har dare ya yi. Sai dai tir haɗi da allawadai da ke fita daga bakunansu. Saboda wasunsu sun shiga part ɗin Zaliha su samo ruwan sanyi, ta wulaƙanta su sosai. Kuma ma a yadda suka tarar da ƙazanta, ba ma lallai ba ne idan za su iya cin wani abu nata.

Washe gari da safe Kabiru ya kamo hannun amaryar suka nufi part ɗin Zaliha. Falon shiru ba ta nan, hakan ya sa ya umurci amaryar kan cewa ta zauna ta jira shi ya zo da Zalihar.

Babu jimawa suka dawo, wayarta a hannunta tana latsa ba ta ko kallon gabanta, har ta ci tuntuɓe da ƙafar amaryar.

Ɗago kanta ta yi ta kalle ta, wa za ta gani? Idanuwa ta ƙwalalo haɗe da sakin wayarta da ƙarfi ta faɗi ƙasa ta rogaje. Da hannu ta rinƙa gwada amaryar laɓɓanta na rawa ta gaza furta komai.

Cikin rawar murya ta samu da ƙyar ta tattaro magana tsakanin laɓɓanta, ta ce,

“Yaya kar dai ka ce min wannan ce amaryar taka.”

Taɓe bakinsa ya yi cikin halin ko’inkula, ya ce,

“Ita ce fa. Akwai damuwa ne?”

Da ƙarfi ta kai wa amaryar shaƙa har wani irin huci take yi. Cikin azama Kabiru ya tashi ya shiga tsakaninsu, yana faɗin,

“Wai Zaliha ba ki da hankali ne?”

Ba ta ko saurare shi ba ta ci gaba da dambe da amaryar.

Wanka mata mari ya yi da ƙarfi wanda har sai da ta riƙe kumcinta. sannan ya jefar da ita jikin kujera sai haki yake yi. Tunda yake a rayuwarsa ko a mafarki bai taɓa tunanin akwai ranar da zai iya ɗaga hannunsa ya daki Zaliha ba. Sai dai abin da ta yi yanzu ne ta gama ƙufular da shi.

Ta miƙe tsaye ta ce,

“Sameera ni za ki ci amana? Wato in gama koyar da ku yadda za ku yi soyayya da mazajenku sannan ƙarshe ki ƙare ga mijina? Allah ya isa tsakanina da ke!”

Dariya Sameerah ta yi, ta ce,

“Ai Zaliha ke wawiya ce! Doluwa! Sannan kuma sakarya! In banda hauka irin naki, sai ki zauna ki koyar da mutane abu amma ke ki gaza yi wa mijinki? Kaɗan ma kika gani. Dama ba ki sani ba tun sadda kike saka status ɗin hotunansa nake jin ya kwanta min a rai. Kwatsam kuma wani ɗan uwana ya haɗa ni da shi. Kin ga abin nema ya samu kenan. Na amince masa na kuma aure shi. Kuma da izinin Allah na shigo kenan, babu mai fitar da ni sai Allah.”

Kuka Zaliha ta fasa, da gudunta ta fice ta nufi ɗakinta. Kabiru da Sameerah kuwa suka koma part ɗinsu, ya ci gaba da bata haƙuri haɗe da ci gaba da soyewarsu.

Tunda ta shiga take kuka. Take jin haushin kanta. Wai duk lokutanta da take kashewa tana wayar wa mata kai, tana daɗa nusar da su abubuwa, a rasa me za a saka mata da shi sai a aurar mata miji. Yanzu kenan duk abubuwan da ta koya wa su Sameera su Sameera za ta yi wa Kabiru?

Ta kuma fashewa da kuka.

*KUN GA YADDA AL-ƘALAMI YA YI SILAR RIGUJEWAR FARIN-CIKIN RAYUWAR AUREN ZALIHA.*

Kaɗan kenan daga illar alƙalami, matuƙar ba a riƙe shi yadda ya kamata ha. Ga shi dai yadda Zaliha ta kasance. Duk ƙoƙarin nata na ganin ta faranta wa fans ɗinta, a ƙarshe ɗaya daga cikin fans ɗin tata ce ta aure mata miji. Ga kuma wayarta ta kayar a ƙasa ta rogaje.

Allah ya sa mu dace, ya sa wannan labarin ya zama izina a gare mu.Tun daga lokacin da mahaifiyar Sameeha ta mata wannan nasihar, sai ta miyar da hankalinta ga rubutu mai cike da ma’ana da faɗakarwa. A tsawon wannan lokacin kuwa sosai Sameeha ta yi suna a duniyar rubutu. Duk inda ka zaga zancenta ake. Zancen labaranta masu tarin ma’ana ake yi.

Maganar ibadarta kuwa sai hamdala! Domin kuwa ta gyara rayuwarta, komai nata ya daidaita. Sallah ba ta wuce ta. Duk yadda take rubutu da zarar an kira sallah sai ta ajje shi ta gaida mahaliccinta. Akwai sadda za ta kai kan wata gaɓa a rubutu, inda ya kamata a ce lallai ta zarce da rubutun, gudun kar ta tashi a samu akasi. Hakan ba ya hana ta ajje wayar ta tashi zuwa sallah.

Haka kuma sam ba ta wasa da aikace-aikacen gida. Duk da cewa suna da mai aiki, amma a hakan Sameeha ke tashi ta taya mai aikinsu aikace-aikacen yau da kullum, kamar dai yadda take yi tun asali kafin da fara rubutu.

Maganar islamiyya ma Sameeha ta koma. A boko ma sosai take miyar da hankali ga karatunta.

Duk sadda Sameeha za ta yi rubutu, takan tuno da nasihar mahaifiyarta, a take sai tsoron Allah ya daɗa shiga cikin zuciyarta. Wani lokacin har hawaye take yi idan ta ci karo da rubutun batsa. Saboda a wasu lokutan takan karanta rubutun wasu marubutan. A yadda ta ci karo da wasu kam sun tashi hankalinta. A daren ranar ba ta iya yin barci ba. Tsoron Allah da tunanin mutuwarta kawai take yi. Tana ji to idan da ita ce ta yi wannan rubutun, da me za ta iya kare kanta ranar gobe ƙiyama? Da wane ido za ta iya kallon wanda suka karanta labarin suka kuma tabbatar cewa ita ce ta rubuta shi? Ta share hawayenta. Sannan ta samu barci ɓarawo ya tafi da ita.

Idan makaranta ta je an rinƙa gwada ta kenan ana faɗin ga Sameeha Aj, wannan shahararriyar marubuciyar ta online.

Wata rana bayan ta fito daga lectures ita da babbar ƙawarta Khadija, sai ga wasu ƴan mata ƴan level 1 sun tarbi su Sameeha.

Cike da mamaki Khadija ta ce musu lafiya?

Daya daga cikinsu ta rungumi Sameeha, hawaye na sauka daga kumcinta.

Sameeha ba ta yi ƙoƙarin raba jikinta da yarinyar ba, sai dai tana mamaki sosai, yadda ƴan matan suke ta kallon ta, ga kuma yarinya sai famar kuka take yi.

Da ƙyar ta samu ta rabu da ita, sannan ta ce,

“I can’t believe cewa wai yau ni ce ga ni ga Aunty Sameeha. Wallahi ni masoyiyarki ce ta gasken gaske, mai matuƙar ƙaunar rubututtukanki. Na jima ina fatar Allah ya haɗa ni da ke ko da a mafarki ne. Ina ƙaunarki da dukkanin zuciyata. Ina alfahari da ke, sannan kuma ina jinjina miki.

Babban abin da ya fi birge ni da rubutunki shi ne yadda suke tsarkakakku, sam babu batsa. Amma kuma hakan bai hana musu yin daɗi ba. Hakan bai hana su yin suna ba. Saɓanin wasu marubutan, wanda suke ganin tamkar ba za su taɓa yin suna da rubutu ba sai idan suna saka batsa. A ganinsu labarinsu ba zai shahara ba har sai ya kasance na banza, ɓata-gari.

Ina jinjina miki sosai Aunty Sameeha. Ashe dai yadda novels ɗin ki suke simple ke ɗin ma haka kike.

Ni baƙuwa ce a garin nan, jiya na zo gidan su cousin ɗita ga ta nan. Yau ta buƙaci in rako ta makaranta, da har na ƙiya ashe dai rabon zan haɗu da ke ne.”

Murmushi sosai Sameeha ke yi, tana jinjina kalaman da suke fita daga bakin yarinyar. Duk sai ta ji ƙaunar kanta. Ta ji ƙaunar alƙalaminta.

A take suka yi musayar lambobin waya, yarinyar ta ce mata ita sunanta Bintu, kuma ƴar garin Kaduna ce.

Haka Sameeha ta koma gida zuciyarta fayau da farin ciki. Lallai ta yarda cewa zama na banza ba zai taɓa saka ka zama abun ƙwarai a ƙarshe ba. Zama na kirki kuwa shi ke haskaka rayuwar mutum, kyakkyawar shaida take ci gaba da bibiyarka a duk inda kake, har zuwa ƙarshen rayuwarka.

Duk da cewa ta sha haɗuwa da fans ɗinta, ba wai a makaranta kawai ba. Amma ba ta taɓa haɗuwa da wadda ta gwada mata soyayya kamar Bintu ba. Hakan ya sa ta labarta wa mahaifiyarta. Ita ɗin ma ta ji daɗi sosai, sannan ta ce mata,

“Kar kuma ki ga hakan ta faru wani girman kai ya ɗarsu a gare ki. Ki sani cewa ita ɗaukaka daga Allah take. Idan ya ga dama a take zai iya kwantar da ke ƙasa wanwar, ki zamto tamkar ba a taɓa yin ki ba.

Akwai su sosai, mutanen da Allah ya ba su ɗaukaka, amma ga su nan kamar ba a taɓa yin su ba.

Abin da nake so da ke Sameeha, ki yi amfani da damar da Allah ya ba ki, ki ci gaba da jawo hankulan mutane, kina kawo gyara sosai, za ki ga yadda za ki ci gaba da samun ɗaukaka.

Allah ya miki albarka, ya albarkaci rayuwarki.”

Wata rana tana zaune kwatsam labari ya riske ta cewa wani professor ta fannin Hausa language ya saka gasar labarai, duk wacce Allah ya ba ta nasara, tana da kyauta mai girma.

Sameeha ba ta yi ƙasa a guiwa ba ta afka gasar nan. Cikin ikon Allah, sai ga ta ta zamto zaƙaƙura, ta lashe gasar baki ɗaya.

Ranar da aka shirya musu taron bada kyautar, sosai Sameeha ta yi kuka. Saboda yadda ta ga dubban mutane sun jeru, wasu ma ba ta taɓa ganinsu ba sai dai jin muryoyinsu take yi a gidajen radio. Masoyanta sun yo dafifi a kanta, wasu na kukan murna, wasu kuwa daɗi suke ji sosai ga su ga ta, suna jinjina wa baiwar da Allah ya ba ta.

Dangi da abokan arziƙi sun taya ta murna har taron ya watse, tamkar kar a gama.

Wannan gasar ce ta ƙara zaburar da Sameeha, ta ƙara kaimi wurin rubutunta. Ta ci gaba ta tsaftace alƙalaminta. Rayuwarta ta nagarta. Ta zama wata abar alfahari, wacce kowa ke muradin a ce ta san shi.

Gidajen biki ko wasu tarurruka haka za ta rinƙa ji ana hirarta, mutane na bayyana yadda suke ƙaunarta, ko da kuwa a ce ba su san cewa ita ce a kusa da su ba.

A silar rubutu ta samu nagartaccen miji. Yayan Bintu ya nemi aurenta, wanda ya kasance shahararren kectirer a ɓangaren Hausa, jami’ar KASU. Labarinta da ya ji, ya sa ya kwaɗaitu da aurenta. Bintu ta masa jagoranci har Katsina, ba a wani ɗau dogon lokaci ba magana ta kankama.

Bayan aurensu ma haka ya ci gaba da bunƙasa mata rubutunta. Ya ba ta goyon baya ɗari-bisa-ɗari, da aljihunshi yake agaza mata, inda ta fiddo littattafai da dama a kasuwa. Hakan kuma bai hana ta ci gaba da rubutunta a yanar gizo ba.

*AL-ƘALAMI YA YI SILAR SAMUWAR ƊAUKAKAR SAMEEHA.*

A nan sai mu gane cewa, ba dukkanin marubuta ba ne suke na banza. Ba dukkanin marubuta ne suke rubutu mara ma’ana ba. Da dama akwai wanda suke rubutu ba wai don su yi suna ba, sai don kawo gyara ga al’umma.

sannan kuma sai mu sani, cewa ba dole sai mun yi rubutun batsa ne za mu samu ɗaukaka ba. Ba dole sai mun yi rubutun batsa ne duniya za ta san mu ba.

Wallahi idan har za mu samu ɗaukakar, to abu mafi ma’ana shi ne mu same ta ta hanyar kirki, hanyar da za mu faɗakar da wasu, ba wai mu fanɗarar ba.

Allah ka sa mu dace, Allah ka sa wannan tunatarwar ta yi amfani ga zukatan al’umma.

Sai mun haɗu da ku a shafin gaba, kuma shafin ƙarshe insha Allah. Inda za mu ji ya rayuwar ƴan matan za ta ƙare?

Abin da ya ci gaba da wanzuwa kenan a tsakanin ƴan matan nan bakwai da suke ɗaki ɗaya. Tun suna ɓoyewa junansu, har suka bayyanar, yayin da suka kasnace su duka bakwai ɗin suna kai wa junansu ziyara.+

A duk sadda za su karanta wani littafi mai wannan al’amurra, to abin da suke yi kenan. Su rinƙa biyan buƙata a tsakaninsu. Wasu lokutan ma idan hakan ba ta samu ba, daga cikinsu akwai wanda suke biyawa kansu da kansu buƙata, ta hanyar masturbation (istimna’i).

Sosai abun ya zame musu jiki. Suka shagala da duniyar, suna ganin ai a yanzu ne ma suke tsananin jin daɗin rayuwarsu.

Tun sadda suka ji labarin ciwon marubuciyar tasu, sai suka sake wata, wacce ta zarce Surayya ma.

Ga su dai a hostel suke, ba kwaɓa bare a ji tsoro ko fargabar yin wani abu. Sai suke cin duniyarsu babu tsinke. Karatun ma suka jingine yin sa, sai biyan buƙata wa junansu kawai.

An ɗauki tsawon shekara ɗaya suna aikata wannan abu. Auren Rumaisa ya tashi, a lokacin sun shiga aji uku kenan a jamia. Bayan an yi hidimar aure an gama, dangi da ƙawaye suka watse, aka bar amarya da angonta kawai.

A wannan lokacin ne Rumaisa ta ji daban. Domin kuwa sam! Ba ta samu jin daɗi ba, ta riga da ta saba mu’amala da mata. Duk yadda za su yi Rumaisa sai ta ji ba daidai ba. Shi ma kuma kansa mijin sai da ya samu sauyi, saboda yana da wata matar, kuma ba haka yake jin ta ba.

A haka suka ci gaba da zaman cikin dauriya, ya bar wa zuciyarsa kawai, amma dai haƙuri yake yi da ita.

Rumaisa na da sati uku da aure, Sarah ta kawo mata ziyara. A lokacin mijin ba ya nan ya fita. Wannan ne ya ba su damar ci gaba da mummunan aikinsu, tunda dama sun yi kewar junansu, ba kuma jin daɗin mijin take yi ba.

A cikin wannan yanayin ya same su, tsirara haihuwar iyayensu, sun yi nisa wurin tafka ta’asa.

Hannuwansa ya ɗora a kai yana ƙare musu kallo. Kallon mamaki. Tunda yake a rayuwarsa bai taɓa gani ba, yana dai jin labari ne. Sai ga shi yau ya gani a wurin matarsa, amaryar sati uku kacal.

Belt ɗin shi ya zaro daga jikin wandon da ya cire, nan ya hau zabga musu, sai ga su firgigit sun dawo hayyacinsu.

Cike da jin kunya suka wawuri kayansu su saka, amma ba su gani ba. Saboda sai da ya kwashe su sannan. Ya ci gaba da dukansu sosai, kuma ya datse ɗakin ta yadda babu halin guduwa. Sai da ya yi musu lilis sannan ya ƙyale su. Ya kuma rubuta wa Rumaisa takaddar saki har uku, yana faɗin

“Ashe mugun abin da kike aikatawa kenan, shi ya sa na ji ki wata iri? Shi ya sa bakya samun biyan buƙata daga gare ni, ki ja min in ta wahala ko? To asirinki ya tonu baƙar matsiyaciya! Kuma aure na da ke ya ƙare! Ki tashi mu tafi, zan miyar da ke a gaban iyayenki, in kuma shaida musu mugun halinki.”

Kuka sosai suke yi, haka ya tasa su gaba har da Sarah, suka nufi gidan su Rumaisah.

Su kuwa sauran ƴan matan, saɓani suka samu a tsakaninsu, wanda ya yi sanadiyyar cece-kuce. Mummunan aikinsu ya sa suka shirya, suka kuma ci gaba da aikinsu na banza.

Ashe tun daga wannan lokacin Lawisa ta ƙudiri ɗaukar fansar abin da suka mata, ashe a ɓangaren Deejah ma haka ne.

Lawisa ta bari suka shagala su duka da aikin, sannan ta lallaɓa ta fice daga cikinsu, saboda dama dare ne. Ta jawo wayarta, ta kunna flash light ta kama ɗaukar su video. Ba ta yi mamakin yadda ba su gane tana yi ba, saboda ta san halin da suke shiga a lokacin da suke yin aikin. Ta jima tana ɗaukar video ɗin, kuma duk sai da ta ɗauko fuskokinsu sannan ta ajje wayar, ta ɓoye inda ko an ɗau wayar ba za a gani ba, sannan ta koma suka ci gaba da yi.

Bayan sallar asubah ma abin da suka ci gaba da yi kenan, a nan kuma sai Deejaah ta samu nasarar ɗaukar video, inda ta ɗauko su har da Lawisa.

Washe gari Lawisa ta fitar da video ɗin, facebook, instagram, snapchart da duk wasu nau’uka na charting da take yi. Sannan ta bi a watsapp groups groups tana sharing, cewa ga wasu ƴan mata da aka kama suna aikata maɗugo.

Sai da ta gama duka sannan ta fashe da dariya, ta ce da su,

“Yan mata ku hau yanar gizo-gizo ku sha mamaki. Ni haka nake, ba a bi na bashi. Wallahi duk wanda ya ci tuwo da ni miya ya sha. Kallon ku nake yi kyar dama. Kuma sai dai idan kun manta, tun a lokacin na faɗa muku sai na ɗau fansa.”

Ta yi ƙas da chewing gum ɗin ta, sannan ta ja trolly bag ɗin ta ta yi gaba, dama jiya suka gama exam, wanda suka yi jiya ma na bankwana ne.

Sadda suka hau nan suka ga mugun abin da Lawisa ta musu. Cike da mamaki suke kallon junansu, ganin babu ita a ciki.

Jinjina kai Deejah ta yi, ta ce,

“Wallahi sunanmu ba zai ɓaci ba mu kaɗai.”

Sannan ita ma ta ɗora na Lawisa, irin yadda ta musu.

Haka rayuwarsu ta ƙare. Sunansu ya ɓaci. Duk inda ka gitta zancen su ake yi. Maganar ƴan matan da aka ɗauka haihuwar uwarsu, wasu mutanen suna la’antarsu.

Babu mai burin ya auri ɗaya daga cikin ƴan matan nan. Har aka samu wani da ya ga Lawisa yana so, ba ɗan garin ba ne. Wasu daga cikin mutanen unguwa aka samu wani ya kai masa video ɗin ya gani. Wannan dalilin ya sa mutumin ya fasa auren ta.

Biyu daga cikinsu kuwa korar su iyayensu suka yi daga gidansu, tunda dama daga makaranta an kore su. Sai suka faɗa harkar karuwanci.

Ƙarshen ƴan matan nan kenan *AL-ƘALAMI YA YI SILAR TAƁARƁAREWAR RAYUWARSU. SUN SHIGA MAWUYANCI HALI TA DALILIN AL-ƘALAMI. KOWA YA GUJE SU TA DALILIN AL-ƘALAMI. SUN RASA MAZAJEN AURE SILAR AL-ƘALAMI.*

Wallahi thumma tallahi hakan za ta iya faruwa. Ku bar ganin wannan shirin littafi ne, to tsaf hakan za ta iya kasancewa. Kun ga al-ƙalamin nan da kuke gani, to ba ku san iya inda zai tsaya ba. Sannan kuma idan yarinya guda ɗaya ta ɓaci ta dalilinki, ki saka a ranki ke ce silah, kuma sai kin samu zunubi ko da kuwa bayan bakya raye ne.

Me zai hana mu taru mu tsaftace al-ƙalummanmu? Me zai hana mu haɗe kawunanmu mu buɗe ƙungiyoyin da za a rinƙa hukunta duk wanda ya gurɓata al-ƙalaminsa? Mu taru mu gyara! Mu yi abin da za mu iya kare kawunanmu ranar gobe ƙiyama.

Mu riƙe babin Sameeha! Za mu ga yadda al-ƙalaminta ya tsarkaka. Za mu ga yadda ta samu ɗaukaka ta dalilin al-ƙalami.

Muna roƙon Allah ya sa wannan gajeren rubutun ya zama izina ga marubutanmu. Allah ya sa a samu wanda za su gyara ta dalilin wannan rubutun. Allah ya sa ya isa inda muke son isarsa.

Mun gode ƙwarai da jimirin bibiyarmu. Sai kun ji mu tafe da wani labarin insha Allah.

Allah ya ba mu ladar inda muka yi daidai. Inda muka yi kuskure kuma Allah ya gafarta mana.2

Ma’assalam.

AL’KALAMINE SILA CHAPTER B KARSHE

Leave a Reply Cancel reply

Categories

Pages